 |
| Found at: perfectthewayyouarerightnow.tumblr.com |
Die
trappe strek tot bo by die lig.
Rooskleurige lig. Onderdeur die
pers bougainvillia. Wit trappe. Dit begin hier onder, by my. In die skadu’s van die marmerpilare, waar die
son nie kom nie.
Ek trek die wit mantel stywer om my
skouers.
Iemand vat aan my hare.
Iemand trek die mantel se sleep lank
agter uit my uit.
‘n Gejuig klink op, vanuit die lig, aan die bo-punt van die
trappe.
Die dwerg hou sy hand na my uit, ‘n
mankoliekerige glimlag om sy wrede lippe.
Hoe hoër ek klim, hoe warmer word
dit. Nog net vyf trappe, dan sal ek kan
sien ...
*
Die
Italiaanse digter, Dante Aligheri, het eenkeer geskryf dat jy sal uitvind hoe
sout ‘n ander man se brood proe en hoe moeilik die weg op en af ‘n ander man se
trappe is.
Ons almal het aan die onderkant van
ons stel trappe begin en op gekyk. Wat ons gesien het is ‘n skoon stel trappe
en ons sien nie die bokant nie.
Met tydsverloop sal ons omdraai en
elke dag meer trappe agter ons sien. Maar wat gaan ons op die trappe sien?
Rommel? Blomme? Vergete pakkies en moddervoete?
Iemand het eenkeer gesê dat ons
almal vry is om enige keuse te maak, maar dat niemand vry is van die gevolge
van hul keuses nie.
En hier waar ek nou aan die
onderpunt van my stel trappe staan, besef ek dat my hele lewe ‘n stel trappe
is. Ons almal se lewens is ‘n stel trappe wat hoër styg. Sommige het kort
stelle trappe, ander langes. Maar een aspek bly onveranderd. Jy gaan sien wat
op die trappe agter jou agtergebly het.
Wat gaan jy sien , daar waar jy op
jou stel trappe staan en omkyk? Sal jy gelukkig wees om jouself te vereenselwig
met die gevolge van jou keuses en besluite? Wat gaan jy sien as jy nou omdraai
en afkyk na al die trappe wat jy reeds geklim het?
Niemand leef in ‘n vakuum nie en
elke beskuit wat jy neem raak ander mense, veral die mense na aan jou. Dit is jou
keuse om dwelms te gebruik of nie, te rook of nie, eerlik te wees of nie, hard
te werk of nie. So kan die lys aangaan.
Maar as jy omdraai en terugkyk wil
jy tog seker ‘n mate van selftrots ervaar na dit wat op die trappe agter jou
agterbly?
Hoe anders dink jy sou Suid Afrika
gewees het indien Madiba, na die verhoor, uit hoofde waarvan hy na Robbeneiland
gestuur is, in ‘n bondeltjie op die trap in die middel van sy stel trappe gaan
sit het? Keuses ….
Hierdie lewenstrappe het ‘n groot
nadeel. Jy kan nooit omdraai en terugklim nie. Jy kan nie drie trappe afklim om
die vergete pakkie te gaan optel nie. Jy kan nooit ‘n nat lap gryp en gou ‘n
paar trappe afhardloop en die moddervoete gaan skoonvee nie. Die rommel op die
trappe agter jou is daar om te bly. Elke keer wat jy omdraai gaan jy
gekonfronteer word deur jou verkeerde besluite en laksheid.
Wat ‘n hopelose situasie is hierdie
lewe dan nie? Hierdie aaklige ou stel trappe wat net op en op gaan, of jy nou
wil klim of nie. Jy kan net opgaan en kort kort omkyk na dit wat agter jou lê.
Maar juis daarom het God sy enigste
Seun aan hierdie wêreld geskenk. En al lê die trappe agter jou besaai met
modder en rommel, hoef dit jou nie af te trek na ‘n bondeltjie hopeloosheid op
‘n trap nie! Jesus het ons sonde skoongewas met sy bloed.
So klim jou stel trappe stadig en
sekuur. Maak jou keuses versigtig en oordeelkundig.
Moet nooit ander oordeel van waar jy
besig is om jou stel trappe te klim nie. Daar is ‘n Amerikaanse Indiaan
spreekwoord wat sê – “Gaan loop eers in ‘n ander man se skoene voordat jy jou
uitspreek oor hom.” Insgelyks – in die woorde van Dante Alighieri – die weg op
‘n ander man se trappe is nooit maklik nie.
*
Die
klokke van die Notre-Dame de Paris beier oorverdowend deur my slaapbenewelde
verstand. Ek sit verward regop.
‘n Koel windjie waai deur die
woonstel se venster en ek trek die wit laken stywer om my liggaam, staan op en
stap kaalvoet tot by die oop venster.
Die Notre-Dame se statige kloktoring reik hoog in die hemelblou lig. Die bougainvillia voor die venster se
persrooi blomblaartjies kleur die lig hier om my roos.
Ek sug en stap terug na die bed.
Ek sal daardie dag, in my droom,
nooit vergeet nie.
Die trappe van die lewe. ‘n Glimlag plooi om my mond. Vandag gaan ek gemaklike stewels aantrek, reg
om dié trappe te klim.
 |
| www.geekszine.com |
No comments:
Post a Comment